Поранешна ѕвезда на „Кралевите“ до Мбапе: Не оди таму, ти не си за Реал Мадрид…

Поранешниот играч на Реал Мадрид, Кларенс Сидорф, смета дека Килијан Мбапе не би бил добар за Реал Мадрид. ПСЖ на Мбапе синоќа беше поразен во Мадрид со 3:1 и со тоа се прости од Лигата на шампионите со вкупни 3:2, а Реал се пласираше во четвртфиналето на крилата на Карим Бензема. Мбапе е во контакт со кралевите со месеци и многумина се убедени дека тој ќе го напушти Париз како слободен играч на лето и ќе потпише за Реал, но Сидорф смета дека 23-годишниот Французин треба да го заобиколи Мадрид.

„Не го гледам Мбапе во Реал Мадрид“, изјави поранешниот играч за врска на Ајакс, Реал Мадрид, Интер и Милан и додаде:

„Ако играше лево, тоа би значело дека Винисиус ќе се пресели на клупата. Каде би можел да игра? Десно каде е Асенсио?“, се прашува Сидорф.

Тој смета дека силата на Реал е единството во тимот, а посебно го пофали Карим Бензема.

„Тој работи за тимот и ја бара топката во длабочина. Мбапе не го прави тоа, таа работа во ПСЖ ја врши Нејмар. Мислам дека на Мбапе му треба друга средина ако сака да напредува“, додаде Сидорф, кој беше европски првак со Реал Мадрид во 1998. Година.

Договорот на Мбапе со Париз истекува на 30 јуни.