Американецот Олуџоби нов член на МЗТ Скопје

Извршниот директор на МЗТ Скопје, Тони Грнчаров претпладнево најави промени во играчкиот состав што почнаа да се остваруваат попладнево. Американецот Феми Олуџоби е нов член на клубот од СЦ „Јане Сандански“. Договорот меѓу двете страни е до крај на сезоната.

Станува збор за крилен центар, има 23 години, висок е 206 сантиметри и во Скопје доаѓа од литвански Лиеткабелис. Како негови главни карактеристики се наведуваат скочноста и брзината и се очекува да има придонес во играта по кошевите.

За Олуџоби ова е прва сезона како професионалец, откако мина четири во американската НЦАА-лига настапувајќи за Оукленд, АиТ универзитетот од Северна Каролина и за универзитетот Депол. Во последните две екипи настапи по една година и тоа со просек од 16,3 поени и 7,7 скока односно со 12,8 поени и 5,4 скока.