Баерн Минхен во април пред полни трибини ќе го пречека Аугсбург

Германскиот фудбалски шампион Баерн Минхен првпат по шест месеци ќе може да игра на домашен терен пред полн стадион, кога ќе се сретне со Аугсбург на 9 април, соопштија од клубот.

Последниот домашен натпревар пред 100 отсто капацитет беше на 6 ноември, но олеснувањето на ограничувањата за коронавирусот значи дека 75.000 луѓе ќе можат да присуствуваат на натпреварот.

Навивачите се суштината на фудбалот и ги прават натпреварите на нашиот стадион, особено сега во одлучувачката фаза од сезоната, нешто уникатно“, изјави потпретседателот на Баерн, Јан-Кристијан Дресен.

Локалните правила во Баварија се менуваат од неделата, а социјалното растојание и носењето маски повеќе не треба да бидат неопходни.

Промената значи и дека Баерн може да и гостува на Борусија Дортмунд на 23 април, во дербито меѓу првиот и вториот во поредокот, исто така со полн капацитет на стадионот.