Формула 1 трката во Сингапур заврши со одбројување

Серхио Перез стигна до својата втора победа сезонава, овој пат на Големата награда на Сингапур.

Поради врнежливите услови, трката доцнеше околу еден час, а кога патеката се исуши, Перез веднаш на стартот го престигна Шарл Леклер и без проблем ја задржа првата позиција до крајот на трката.

Трката не беше премногу возбудлива. Виртуелното безбедносно возило и вистинското безбедносно возило беа користени неколку пати, поради што трката заврши со одбројување, бидејќи е неопходно трката да се заврши во рок од два часа.

Шарл Леклер заврши како втор, додека Карлос Саинц од Ферари го комплетираше подиумот. Одлична трка имаше и Ландо Норис кој стигна до четвртото место.

Макс Верстапен заврши седми и стартуваше од осмото место. Не успеа да напредува многу поради малку полошиот старт. Во еден момент излета и од патеката, што го чинеше и позиција, но на крајот сепак успеа да се спаси.

Луис Хамилтон долго време беше во борба за подиумот, но при еден обид да го претекне Саинц, излета од патеката и падна на десеттото место. Тој заврши како деветти.

Бодови освоија и Даниел Рикиардо кој заврши на петтото место и дуото на Астон Мартин Ленс Строл и Себастијан Фетел кои беа шести и осми. Пјер Гасли заврши на 10. место и освои еден бод.

Ден за заборав имаше Фернандо Алонсо, кој мораше да се откаже во својот 350-ти настап, што е апсолутен рекорд, иако добар дел од трката беше меѓу првите шест.

Земајќи шест поени, трката за светската титула на Верстапен е продолжена за најмалку седум дена бидејќи новата трка се вози на 24 септември во Јапонија на патеката Сузука.

Верстапен сега има 344 бодови, а вицешампионот 238 бодови. Денешниот победник Перез со нови 25 поени стигна до вкупно 235 поени.