Каков реванш на Камп Ноу, Реал со 0:4 во финалето на Купот на Кралот!

Фудбалерите на Реал Мадрид се пласираа во финалето на шпанскиот Куп на кралот откако убедливо победија над најголемиот ривал Барселона. Со хет-трикот на Карим Бензема!

Натпреварот на стадионот Камп Ноу заврши со резултат 0:4!

Во првиот натпревар во Мадрид, Барселона победи со 1:0 и важеше за фаворит во реваншот. Меѓу другото, затоа што во 2023 година најголемите ривали одиграа веќе три „Ел Класикоа“ и Каталонците славеа трипати: во Суперкупот беше 3:1, во Примера 2:1 и во Купот на кралот споменатиот триумф од 1:0.

И стартот на вечерашниот дуел не навестуваше ништо друго. Фудбалерите на Барселона беа подобри во првите 45 минути. Сепак, во судиското надополнување на првото полувреме, Карим Бензема само го потврдува голот на Винисиус Јуниор и Реал неочекувано поведе – 0:1.

Тој гол изгледа целосно ги вознемири Каталонците. Веднаш штом започна вториот дел, Бензема го искористи додавањето на Лука Модриќ и со удар од далечина го постигнува вториот гол за гостите.

И тогаш комплетно ја разниша Барселона, а се чини дека целосно се предадоа по третиот гол, кој го постигна Бензема од пенал во 58. минута. Претходно, Кеси го фаулираше Винисиус Јуниор во шеснаесетникот.

Од тој момент беше само прашање со колку голови ќе загубат Каталонците, а во 80. минута Карим Бензема го комплетираше хет-трикот и комплетната одмазда кон Барселона за претходните порази.

Реал во финалето ќе игра против Осасуна, која во првото полуфинале беше подобра од Атлетик Билбао. Финалето е на 6 мај во Севиља.