Клоп: Не размислувам за Манчестер Сити, но знаеме што треба да направиме

Менаџерот на Ливерпул, Јирген Клоп беше презадоволен по победата на неговиот тим над Арсенал од 2:0 во одложениот натпревар од англиската фудбалска елита.

Успехот во северен Лондон го остави Ливерпул на второто место во поредокот, но тимот заостанува само бод зад Манчестер Сити на девет кола пред крајот на Премиер лигата, а двата тима имаат директен меч меѓу себе. Натпреварот на „Етихад“ ќе се одигра на 10 април, а тој најверојатно ќе одлучи во кој правец ќе оди титулата во Премиер лигата годинава.

И додека Ливерпул сега е тим во форма во дивизијата, Клоп е внимателен да не верува премногу во моментумот што би можел да го доведе Ливерпул до втората титула за три години.

„Импулсот е „најкревкото цвеќе“ на планетата. Ако некој го згази, тогаш мора да се потрудите исклучително напорно за да го вратите. Ритамот е добар на секои три или четири дена, но е пеколно интензивен. Не се жалиме затоа што сакаме да играме на сите турнири. Добро е, но и тешко, бидејќи нашите противници се навистина различни“, започна Клоп.

„Вистината е дека не размислувам многу за Манчестер Сити. Знам дека единствената шанса ни е да победиме на огромен број натпревари, бидејќи нашиот директен противник добива огромен број натпревари. Во текот на последните неколку години, се туркавме на екстремно високи нивоа. Ова го прави секој натпревар потежок. Треба да уживаме, но и да бидеме подготвени за интензитетот“, изјави Клоп по успехот над Арсенал.

„Мислам дека не е проблем некој да остане фокусиран три дена на она што го прави. Сепак, тука се работи за физичкиот дел од играта. Не се борам со Сити. Ќе играме со нив за три или четири недели и ќе им дадеме сериозна битка. Во добар момент сме, расположени и знаеме дека можеме да се носиме со тешкотиите“, додаде Германецот.