Connect with us

Фудбал

Марко Асенсио прави изненадувачки трансфер во финишот на преодниот рок, 30 милиони евра за Реал

Крилниот напаѓач на Реал Мадрид, Марко Асенсио во овој преоден рок би можел да замине во Манчестер Јунајтед, објави шпанскиот портал „Relevo“.

Иднината на Асенсио се уште е нејасна. Неговиот договор со Реал Мадрид истекува на крајот од оваа сезона, па шпанскиот клуб е пред последната шанса да заработи од неговиот трансфер.

Според информациите на шпанскиот портал „Relevo“, Манчестер Јунајтед е решен да испрати официјална понуда за Асенсио. Англичаните ќе понудат повеќе од 30 милиони евра.

Новинарот Серхио Сантос исто така известува дека во игра за играчот ќе бидат и други клубови од Англија и Италија. Подготвени се и да дадат атрактивни понуди.

Сепак, не е сигурно дали Реал Мадрид ќе сака да се ослободи од играчот. Карло Анчелоти, тренерот на освојувачот на Лигата на шампионите, признава дека се уште смета на овој играч.

Од друга страна, во првите три натпревари од сезоната (два во Ла Лига и еден во Суперкупот на Европа), Асенсио одигра само осум минути вкупно. Крилниот напаѓач на теренот влезе во 82. минута во победата од 4:1 на гостувањето кај Селта Виго.

Претходно во пресметките со Алмерија и Ајнтрахт Франкфурт седеше на клупата за резерви цел натпревар.

Асенсио минатата сезона играше за Реал Мадрид на 42 натпревари. Постигна 12 гола и имаше две асистенции. Доколку дојде во Манчестер Јунајтед, тој би бил вториот играч на Реал Мадрид кој ќе тргне во оваа насока во овој летен преоден рок. Претходно на ваков трансфер се одлучи и Касемиро.

Реал Мадрид досега донесе две солидни засилувања. Шпанците го ангажираа 22-годишниот Орлиен Чоамени од Монако кој чинеше 80 милиони евра плус бонуси. Покрај тоа, Реал Мадрид го ангажираше Антонио Рудигер, кој како слободен играч пристигна од Челзи.