Португалија го собори рекордот без Роналдо. Го исмејуваат на социјалните мрежи, соиграчите го бранат

Репрезентацијата на Португалија ја продолжи перфектната серија во квалификациите за ЕП 2024 со најубедливата победа во историјата. За шестата победа во шест натпревари, Португалците го декласираа Луксембург со 9:0, надминувајќи го за еден гол нивниот стар рекорд постигнат три пати, последен пат против Лихтенштајн во 1994 година.

Рекордната победа ја постигнаа без Кристијано Роналдо, кој – случајно или не – го заработи третиот жолт картон во квалификациите во петочната победа над Словачка од 1:0 и го пропушти овој натпревар поради суспензија. Секако, социјалните мрежи експлодираа и заклучија дека отсуството на Роналдо е причина за ваквата напаѓачка рапсодија на Португалија.

Но, неговите соиграчи цврсто ги отфрлаат таквите пресметки.

„Да играше Роналдо, резултатот ќе беше ист. Ќе помагаше со головите и асистенциите. Неговото отсуство не е причината зошто победивме со девет разлика“, изјави играчот од средниот ред на ПСЖ, Данило.

Само втор пораз на Луксембург во шест натпревари

Гонкало Инасио, Гонкало Рамос и Диого Жота постигнаа по два гола, Рикардо Хорта, Бруно Фернандеш и Жоао Феликс по еден, а Фернандеш имаше и три асистенции.

Тоа беше само втор пораз за Луксембург во шест квалификациски групи, а го држи третото место во групата Ј со 10 бодови, откако ги победи Лихтенштајн и Исланд, ја шокираше Босна и Херцеговина во Зеница и зеде бод на гостински терен во Словачка.