Барса договори нова „граната“

Лидерот во рангирањето на шпанскиот фудбалски шампионат Барселона е многу блиску до привлекување на централниот дефанзивец Иниго Мартинез, објави новинарот Фабрицио Романо.

Шпанскиот интернационалец од 2018 година настапува за тимот на Атлетик Билбао, но неговиот договор со баскискиот тим истекува на крајот од актуелната сезона и се чини дека нема да биде продолжен.

Според Романо, прецизирани се сите параметри на зделката, вклучувајќи ја и должината на договорот, како и платата. Единствената причина поради која договорот не е потпишан е поврзана со можните ограничувања кои Каталонците може да ги добијат од Ла Лига поради правилата за финансискиот фер-плеј. Кога овие детали ќе бидат финализирани, договорот ќе биде финализиран.

31-годишниот Иниго Мартинез е младински играч на Реал Сосиедад. Во кариерата има настапувано само за Сан Себастијан и Атлетик Билбао. За репрезентацијата на Шпанија има 19 натпревари и еден гол.