Де Бур: Се случи најлошото нешто што можеше да ни се случи

Селекторот на Холандија, Франк де Бур вели дека неговиот тим бил подобар ривал од Чешка, но дека пропуштената шанса на Доње Мален и црвениот картон на Матијас де Лихт решително влијаеле на поразот и испаѓањето во осминафиналето од Европското првенство.

По три победи во групната фаза, Лалињата разочара во првата нокаут рунда. Тие загубија од Чешка со 2-0 и го завршија ЕУРО.

Мален и Де Лихт придонесоа најмногу за ваквиот исход. Првиот поради неверојатна пропуштена шанса, а вториот поради несовесното примање црвен картон.

„Бевме подобар ривал до тој црвен картон. Доминиравме во играта, пробивајќи се на крилјата над Дамфрис и Ван Анхолт, но го промашивме тој последен пас “, рече Де Бур и додаде:

„Вакви натпревари се решаваат со еден или два детали. Имавме голема шанса преку Мален, а неколку секунди подоцна останавме со десет. Ни се случи најлошото што можеше да ни се случи “.