Купот ќе се игра во Гевгелија

Завршниот турнир од Купот на Македонија по три години пауза повторно ќе се одржи во Гевгелија, во периодот од 15 до 17 февруари. По неуспешната лицитација за доделување на организацијата истата остана под капата на МКФ, а челниците на куќата на кошарката постигнаа договор за градот-домаќин од последниот квалификациски натпревар против Косово да го организира и завршниот турнир од Купот на Македонија.

Овој турнир ќе мине во заедничка организација на двата клуба од Гевгелија, Блокотехна и Кожув, кои меѓусебно ќе ги договорат деталите околу местото на одигрување на средбите во женска и во машка конкуренција.

Воедно, однапред познати се и четвртфиналните двојки, па така бранителот на трофејот МЗТ Скопје за противник ќе го има Кожув, вториот ко-домаќин Блокотехна ќе се сретне со АВ Охрид, актуелниот шампион Работнички ќе ги одмери силите со Куманово, а Гостивар и Фени индустри во меѓусебна борба ќе решаваат за патникот во полуфиналето.