Трајчевски: Работнички има иста цел, пак да игра во Европа

Работнички бележи позитивен тренд, во изминатите три кола нанижа три победи и се искачи на шестото место на табелата со 16 освоени бода. Слабиот старт е минато, а промената на тренерската позиција донесе нови ветришта. Од повреда се врати и капитенот Душко Трајчевски, кој најавува дека и оваа сезона Работнички има иста цел, да избори излез на европска сцена.

„Среќни сме што го оставивме зад нас лошиот период. Имавме навистина непријатен старт на првенството, можеби и затоа што многу рано почнавме со настапи, во квалификациите за Лигата на Европа. Ни се случија и неколку повреди, дел од фудбалерите не можеа да играат, а имаше и промени во играчкиот кадар. Но, не се навраќаме сега на минатите денови, туку сакаме да продолжиме со овој позитивен тренд. Тимот почна полека да функционира и според замислите на новиот шеф на стручниот штаб Горан Станковски, иако сите мислиме дека има уште многу простор за поголем напредок во играта“, анализира капитенот Душко Трајчевски.

„Апсолутно. Прва и основна желба е да ме служи здравјето, а што се однесува до клубот, Работнички повторно да обезбеди излез на европската сцена. И верувам дека сме на вистинскиот пат по овие последни игри и победи. Долго е првенството, ќе има уште многу тешки натпревари, но Работнички покажа дека има потенцијал да се бори за позициите при самиот врв на табелата во Првата лига“, истакнува Трајчевски.