Вардар без решение за Барселона

Македонскиот ракометен шампион Вардар го претрпе првиот пораз на домашен терен во Лигата на шампионите, откако беше надигран од Барселона во 30:26.

Иако салата „Јане Сандански“ беше исполнета до последно место, а навивачите создадоа одлична атмосфера, ракометарите на Барса покажаа дека се „отпорни“ на „вулканот“ во Скопје, диктирајќи го темепото 60 минути и стигнувајќи до бодови со кои се зацврстија на врвот на табелата во А – групата.
Дибиров со шест и Кристопанс со пет гола беа најефикасни во таборот на Вардар, четири постигна Чупиќ, додека кај Барселона најдобар поединец во победата покрај голманот Де Варгас беше Дика Мем со осум гола.

Пред Парондо и „вардарци“ е многу работа ако се знае дека наредниот викенд ги очекува нов дуел со Барселона, овојпат во каталонската престолнина, на кој евентуален пораз би значел и речиси сигурно губење на шансите за освојување на првото место во групата.