Вардар без Циндриќ и Мораеш во дербито со Рајн Некар Ловен

Европскиот шампион Вардар на денешниот дуел од 8.коло од Лигата на шампионите на домашен терен против германскиот првак Рајн Некар Ловен ќе настапи без двајца стандардни играчи Лука Циндриќ и Фереира Мораеш. Двајцата поради повреди ќе го прескокнат денешниот натпревар, кој го има епитетот дерби на колото.

Ова ќе биде дуел на двете непоразени екипи во групата А Вардар и РНЛ. Вардар има еден нерешен резултат, а РНЛ – три нерешени исходи.

Лани на натпреварот од групата на овие две екипи во Скопје победи германскиот тим со 29:26 и тоа е последниот домашен пораз на „црвено-црните“.

Во отсуство на Циндриќ и Мораеш, тренерот на Вардар Раул Гонзалез ќе настапи со следните 16 играчи: Арпад Штербик, Стојанче Стоилов, Владо Недановски, Мартин Поповски, Даинис Кристопанс, Страхиња Милиќ, Хорхе Македа, Игор Карачиќ, Илија Абутовиќ, Жоан Кањелас, Иван Чупиќ, Тимур Дибиров, Данил Шишкарев, Вуко Борозан, Јања Војводиќ и Мијало Марсениќ.

Во редовите на Рајн Некар Ловен ќе настапи македонскиот репрезентативец Филип Талески.