Ѕвездата на Јувентус заминува на зима? „Алегри глуми голем тренер“

Доколку нешто драстично не се промени Паоло Дибала веќе оваа зима би можел да ги спакува куферите и да го напушти Јувентус.

Во последно време Дибала не игра баш многу. Од трите натпревари од Серија А само на еден беше во стартните 11, додека на една воопшто не играше, а сето ова резултираше со гласини за заминување од клубот.

Дека за Дибала вистински потег би бил трансфер уверен е и претседателот на неговиот поранешен клуб Палермо, Маурицио Зампарини кој жестоко го нападна тренерот Масимилиано Алегри.

„Ми доаѓа да плачам секој пат кога ќе го видам Дибала да седи на клупата. Сето тоа е поради Алегри кој глуми голем тренер. Нека дојде во Палермо и да го освои Скудетото. Лесно е со Јувентус, тука си прв и пред да започне сезоната“, изјави Зампарини, па додаде:

„Верувам дека Дибала во јануари ќе замине во Шпанија. Штета е да не ја гледаме играта на феномен како него“.

Дибала се приклучи на Јувентус во 2015 година за 36 милиони фунти.